އިސްޓާޓުނުވި ސައިކަލު

ލިޔުނީ: މުޙައްމަދު ޤާސިމް

ކަންކަމާ މާހިތް އަވަސްވެ، އަވަސް އަރުވާލައިގެން އުޅެން ޖެހުމުން ވަރަށް ތަފާތު ކަންކަމާ ކުރިމަތިލާން ޖެހެއެވެ. އެގޮތުން ކުރިމަތިވާ ކަންކަމުގެ ތެރޭގައި، ވަރަށް ހިތާމަހުރި ކަންކަމާއި އެހެން މީހުންގެ މަލާމާތާއި ފުރައްސާރައާ ކުރިމަތިލާންޖެހޭފަދަ ކަންކަން ހިމެނެއެވެ. މީގެއިތުރުން ބައެއް ފަހަރު، ހިނިއަންނަ ޒާތުގެ ކަންކަމާ ވެސް ކުރިމަތިލާން ޖެހިފައިހުންނަނީ މަދެއްކޮށެއް ނޫނެވެ.
ރެއަށް އިރުއޮއްސުނުއިރު، އެރޭ އަށް ގަޑިބައިގައި އޮތް ރަސްމީ ބައްދަލުވުމަކަށް ވަނީ ދަޢުވަތު ލިބިފައެވެ. އެހެންނަމަވެސް އެ ރޭގެ އެޖެންޑާ ހަމަޖެހިފައިއޮތީ، ވަރަށް އަވަދިނެތި އުޅެންޖެހޭކަހަލަ ގޮތަކަށް ކަމަށްވާތީ، ކަންބޮޑުވާގޮތްވިއެވެ. ބައްދަލުވުމަކީ ވަރަށް މުހިންމު ބައްދަލުވުމެކެވެ. މަސައްކަތްކުރާ ދާއިރާގެ ގޮތުންނެވެ.

އިރު އޮއްސިއްޖެއެވެ. ކުރަންހުރި މަސައްކަތްތަކުގެ ތެރެއިން، އެ ރޭ ކޮންމެހެން ކުރަންހުރި ބައެއް މަސައްކަތް ނިންމާލެވުނުއިރު، އަށެއް ޖަހަން ދިހަވަރަކަށް މިނެޓަށް ވެއްޖެއެވެ. ހިތަށް އެރިއެވެ. ހާދަހާ ލަސްވެއްޖެއެވެ. އަދި ފެންވަރަން އެބަޖެހެއެވެ. ފެންވެރުމަކީ، ކުޑަކުޑަ ކަމެކޭ ހީވިޔަސް، ބޮޑުކަމެކެވެ. ވަގުތުތަކެއް ނަގާ، ބުރަ ވެސް ކަމެކެވެ. ބައެއް މީހުން ފަސް ހަ މިނެޓުގެ ތެރޭގައި ފެން ވަރާލައިގެން ނިކުންނާތީ، ހަމަ ހައިރާންވެއެވެ. ހިތަށް އަރައެވެ. އެ މީހުން އެ ނިކުންނަނީ ފެން ވަރައިގެން ބާވައެވެ؟ ނޫނީ ކުޑައިރު މަންމަމެން ބުނާހެން “ބޮލަށް ދާންޏެއް، ދެކޮނޑަށް ދެ ދާނި އަޅައިގެން” ބާވައެވެ؟

އެ ގޮތަށް އަވަހަށް ފެންވެރޭތޯ އަޅުގަނޑު ވެސް ވަރަށް މަސައްކަތް ކުރީމެވެ. ކާމިޔާބެއް ނުވިއެވެ. އެންމެ އަވަހަށް ނިކުމެވޭ ފަހަރު ވެސް ފަނަރަ މިނެޓު، ވިހި މިނެޓު ނަގައެވެ. މިކަމާ ގޭ މީހުން ބައެއްފަހަރު ދިމާކޮށް ވެސް ހަދައެވެ. ފާޚާނާތެރޭ ކުރަނީ ކީއްހެއްޔެވެ؟ ނަށަނީ ހެއްޔެވެ؟ ކަސްރަތު ކުރަނީ ހެއްޔެވެ؟ އަޅުގަނޑު އަޅައެއް ނުލަމެވެ. އަޅައިލައިގެން ވަކިން ކުރާނީ ކީއްހެއްޔެވެ؟ ވާވަރުވިއްޔާއެވެ.

ގެއަށް ވަދެވުނުއިރު އަށެއް ޖަހަން ހުރީ ފަސް ވަރަކަށް މިނެޓެވެ. ތުވާއްޔާއި އެއްޗެހި ހިފައިގެން އަވަސްއަވަހަށް ފާޚާނާއަށް ދެމިގެންފީމެވެ. އެކަހަލަ ބައްދަލުވުމަކަށް ފަސްވަރަކަށް މިނެޓު ކުރިން ދެވޭތޯ ބަލަން ޖެހޭނެއެވެ. އެހެންނޫނީ ވާނީ ލަދުހުތުރު ކަމަކަށެވެ. އެކަން ސިކުނޑީގައި އޮންނާތީ ފެންވެރުނީ ވެސް ފާޑަކަށެވެ. ކުރިން ދެންނެވިހެން ކަންނޭނގެއެވެ.
ވަންތާ ދިހަވަރަކަށް މިނެޓުގެ ތެރޭގައި ނިކުމެއްޖައީމެވެ. ގޭ މީހުން ހައިރާންވިއެވެ. ވާނީ ވެސް އެހެންތާއެވެ. މިއީ އަދި ނުވާކަމެކެވެ. ކާމިޔާބެއްތާއެވެ. އެކަމަކު ކާމިޔާބެއްނަމަ ހިތަށް ފިނިކަމެއް ލިބޭނެއެވެ. އެ ކަމެއް ނުވިއެވެ. ފެންވެރުނު ކަމުގެ އެއްވެސް ހިތްހަމަޖެހުމެއް ނުލިބުނެވެ.

ތައްޔާރުވެލައިގެން ގެއިން ނިކުތްއިރު، އަށްގަޑި ބައިވާން ހުރީ ހައެއްކަ މިނެޓެވެ. ނިކުމެނިކުމެ ހުއްޓާ ފޯނެއް އަންނަން ފެށިއެވެ. އަވަސްއަވަހަށް ޖީބުން ފޯނުނަގައި ބަލައިލީމެވެ. ރައްޓެސެކެވެ. ކިހިނެއްވީތޯ އަހައިލުމާއެކު ބުނީ، އޭނާ ވެސް އެ ބައްދަލުވުމަށް ދާންޖެހޭ ވާހަކައާއި ދާ މަގުމަތީގައި އެ ގޭ ދޮށަށް ކައިރިކޮށްލައި އޭނާ ގޮވައިގެން ދިޔުމަށެވެ. އަވަހަށް ނިކުންނާށޭ މިހާރު މި ކައިރި ކުރަނީއޭ ބުނެފައި، ސައިކަލަށް އަރައި ނައްޓާލައިފީމެވެ. ދުއްވުނީ ވެސް ތަންކޮޅެއް ބާރަށެވެ. ދާން ޖެހެނީ ގަލޮޅުން މާފަންނަށެވެ. ބައްދަލުވުން އޮތީ މާފަންނުގައި ކަމަށްވާތީއެވެ.

ނައްޓައިލިތާ ދެ މިނެޓެއްހައިއިރުގެ ތެރޭގައި، އެ ގޭ ދޮށަށް ކައިރި ކުރެވިއްޖެއެވެ. ރަހުމަތްތެރިޔާއެއް ނުނިކުމެއެވެ. ފޯނު ނަގައި ގުޅާލައިފީމެވެ. ނަގައިފިއެވެ. މިއިނީ ތިޔަ ގޭ ކައިރީގައޭ، އަވަހަށް ނިކުންނާށޭ ބުނުމާއެކު، އާނ މި ނިކުންނަނީއޭ ބުނެފައި، ފޯނު ކަނޑާލައިފިއެވެ. އަހަރެން މަޑުކޮށްލީމެވެ. ޕެޓްރޯލު ތަންކޮޅެއް މަދުވެފައި ހުރުމުން އިންޖީނު ނިވާލައިފީމެވެ. އިސްޓާޓު ކޮށްލުމަކީ މާދަތިކަމަކަށް ނުވާނެތީއެވެ. އެއީ ހަމައެންމެ ފިތާލުމެކެވެ.

މި ޖެހުނީ ދެން ކިހާ ދެރަކަމެއް ހެއްޔެވެ؟ ގަޑިޖެހެނީއެވެ. ރަނގަޅަށް ފެން ވެސް ނުވަރައި ނިކުމެ މިއުޅެނީ، ގަޑިނުޖެހި ބައްދަލުވުމަށް ދެވޭތޯއެވެ. މިހާރު އެހެރަ ވަގުތު ކުޑަތަން ވަނީއެވެ. އަދިވެސް އޭނާ ނިކުންނާކަށް ނޫޅެއެވެ. ގަޑިޖެހެން ތިން މިނެޓަށް ވެއްޖެއެވެ. އަނެއްކާ ވެސް ގުޅައިފީމެވެ. މިނިކުންނަނީއަކުން ނޭރިއެވެ. އަވަސްކުރާށޭ، ގަޑިޖެހެނީއޭ، ބުނެފައި ފޯނު ބާއްވައިފީމެވެ. އަހަރެން އިނީ ހިތް އަވަސްވެފައެވެ. ޔަޤީނެވެ. މިހާރު އެންމެން ގޮސް ހަމަވެދާނެއެވެ. މިއަދު ގަޑި ނުޖެހި ދެވޭނޭގޮތެއް އެއީ ނެތް ގޮތެކެވެ. މީނާގެ ސަބަބުން ހުރިހައި ގެއްލުމެއް އަހަންނަށެވެ.

ހިތާހިތުން ކުދި ކިޔަކިޔައި އިންދާ އެކުވެރިޔާއަށް ގެއިން ނިކުމެވޭވަރު ވެއްޖެއެވެ. އޭރު ގަޑިޖެހެން ދެ މިނެޓަށް ވެއްޖެއެވެ. އަވަހަށް އަރާށޭ، މިހާރު އެ އޮތް ގަޑިޖެހެނީއޭ ބުނެފައި، އިސްޓާޓިން ބަޓަނަށް ފިތާލައިފީމެވެ. އިސްޓާޓެއް ނުވިއެވެ. އަޑެއް ވެސް އިއްވާނުލިއެވެ. ކަންތަކާ ޖެހުނީއެވެ. “ކެލެޖް” ކޮށްގެން ވެސް އުޅެއުޅެ ނުވިއެވެ. ރުޅި އަންނަގޮތް ވެއްޖެއެވެ. އެކަމަކު ރުޅި އަންނަންވީ ކާކު ދެކެ ހެއްޔެވެ؟ އެކުވެރިޔާ ދެކެ ހެއްޔެވެ؟ ނޫނީ ސައިކަލު ދެކެ ހެއްޔެވެ؟
“ކިކު ޖަހާބަލަ!” އެކުވެރިޔާ ހަނދާން ކޮށްދިނެވެ.

އެކުވެރިޔާގެ ބަހަށް އެކަން ފަށައިފީމެވެ. ދާހިއްލާން ފަށައިފިއެވެ. ގަޑިޖެހިގެން ހިނގައްޖެއެވެ. އިސްޓާޓުވާގޮތެއް ނުވިއެވެ. ވަރުބަލިވެ ގުނބުލެވޭގޮތްވުމުން ސައިކަލުން ފައިބައިފީމެވެ. ކިކުޖަހަން އެކުވެރިޔާއާ ހަވާލުކޮށްފައެވެ. އޭނާ ފަށައިފިއެވެ. ދާހިއްލާ ފޯވާންދެން އޭނާ ވެސް މަސައްކަތް ކޮށްފިއެވެ. ކަހާތަން ހިރުވައި ވެސް ނުލިއެވެ. ނުތަންވަޅު ވެގެން އުޅޭ ރެއެއްކަމުން، ސައިކަލު ވެސް އެއް ނަންބަރުގެ ޖެއްސުމެއް ކޮށްލީއެވެ.

އަށްގަޑި ސާޅީސް ފަހެއް ހިނގައިފިއެވެ. ބައްދަލުވުމަށް ދިޔުމުގެ ޚިޔާލު މުޅިން ދޫކޮށްލައިފީމެވެ. މިހާރު ދެން އެންމެ މުހިންމީ ސައިކަލު ހެދުމެވެ. އެހެން ތަނަކަށް ވެސް ދެވޭނީ މި އެތިގަނޑު ހެދިގެންތާއެވެ. މާ ދުރުނޫން ހިސާބެއްގައި ގަރާޖެއް ހުންނާނެއެވެ. އެހެންކަމުން ސައިކަލު ހިފައިގެން އަޅުގަނޑު ހިނގައިގެންފީމެވެ. އެކުވެރިޔާ ވެސް އަޅުގަނޑު ފަހަތުން އައެވެ.
ތަންކޮޅަކަށް ގޮސްފައި ކުއްލިއަކަށް ކަމެއް ހަނދާންވެގެން އަޅުގަނޑު މަޑުކޮށްލައިފީމެވެ. ސައިކަލާ ދިމާއަށް ބަލައިލައިފީމެވެ. ތަޅުދަނޑިއަށެވެ. ތަޅަށް ޖެހިގޮތަށް ތަޅުދަނޑި އެބަހުއްޓެވެ. އެކަމަކު……….. އަޅުގަނޑަށް ދެ ފަރާތަށް ބޯ ހަލުވައި ލެވުނެވެ. ހިތަށް އެރިއެވެ. ސަހަރޯއެވެ! މިއޮތް ކުރެވުނު ކަމެކެވެ. ތަޅުދަނޑި އެހެރީ އޭރު ސައިކަލު ނިވާލަން އަނބުރައިލި ގޮތަށެވެ. އިސްޓާޓު ކުރަން މިއޮތް ހުރިހައި މަސައްކަތް މިކުރެވުނީ ތަޅުނުހުޅުވާ ބަހައްޓައިގެންނެވެ.

މިކަން އެނގުމާއެކު އެކުވެރިޔާ ޖަހައިލީ “ނުލަފާ” ހިނިގަނޑެކެވެ. މިއީ ކަލޭގެ ކަންތަކޭ ބުނެފާނަމޭ ހިތަށް އެރިއެވެ. އެކަމަކު އެއްޗެއް ނުބުނަމެވެ. ސައިކަލަށް އަރައި އިށީނދެ، ތަޅުދަނޑި އަނބުރާލައިފައި ފިތާލައިފީމެވެ. ވަގުތުން އިސްޓާޓުވެއްޖެއެވެ. އެކުވެރިޔާ އެ ތަނަށް ދޫކޮށްލާފައި ނައްޓާލައިފީމެވެ. އެކަމަކު ޖަލްސާއަކަށް ނޫނެވެ. ގެއަށެވެ. އަނެއްކާ ވެސް ފެންވަރާށެވެ.