“ކުށެއް ނެތް އަދަބު، ސަކީނާގެ ހިތްދަތިކަން، މާދަމާ އަތުވެއްޖެ ނަމަ، ރިހި ސިލިންޑަރު، ފިނި މެންދަމެއްގެ މަޑު ހޫނު، ބިލާހެއް…” މަޑުލު މުހައްމަދު ވަހީދު އެއީ ކޮން ބޭފުޅެއްކަން ނޭނގޭ އިރު ވެސް، މި ވާހަކަތަކަކީ އަޅުގަނޑުގެ ވަރަށް ގާތް މިތުރުންނޭ ބުނުން ދޮގަކަށް ނުވާނެއެވެ. މަޑުލު ވަހީދުގެ ކުރުވާހަކަ ފޮތުގައި ހިމެނޭ ކޮންމެ ވާހަކައެއް ވެސް، އެތައް ފަހަރަކު އަޅުގަނޑަށް ވަނީ ކިއިފައެވެ. ރީތިކަމުންނެވެ. ކިޔައި ހިތުންނެވެ. އެއިން ކޮންމެ ވާހަކައެއް ވެސް، ކީކީހެން ވަނީ ރީއްޗެވެ. މިއަދު ވެސް ވަނީ ހަމަ އެހެންނެވެ. އެހެން އެ ވަނީ ކީއްވެގެންކަން އޭރު ނޭނގުނަސް މިހާރު އެނގެއެވެ. އެއިން ކޮންމެ ވާހަކައެއްގައި ވެސް އަދަބީ މީރުކަން އޭގެ އެންމެ މަތީ ދަރަޖައަށް އެކުލެވޭތީއެވެ.
އޭރު (މަޑުލު ވަހީދާ އަޅުގަނޑާ ބައްދަލު ނުވާ އިރު) ވެސް އަޅުގަނޑުގެ ހިތަށް އަރައެވެ. މަޑުލު ވަހީދަކީ ދިވެހި ބަހަށް ހާދަ މޮޅު ބޭފުޅެކެވެ. އެހެން ހިތަށް އަރަނީ، އޭނާގެ ވާހަކަތައް ރީތިވެގެން އެކަންޏެއް ނޫނެވެ. އެ ވާހަކަތަކުގެ ބަސްމަގު ގެންގުޅުއްވާފައި ހުރިލެއް ފުރިހަމަކަމުންނެވެ. އިބާރާތްތައް އުފައްދަވާފައިވާލެއް ފަށުވިކަމުންނެވެ. ސިފަކުރުންތައް ގެންނަވާފައިވާލެއް މޮޅުކަމުންނެވެ. ކުރުކުރު ޖުމުލަތަކުން ކިޔުންތެރިންގެ ހިތްތަކާ ކުޅެލައިލެއް ބޮޑުކަމުންނެވެ. އެހެންކަމުން ވަހީދާ ބައްދަކޮށްލަން އަޅުގަނޑު ހުންނަނީ ވަރަށް ބޭނުންވެފައެވެ.
އެއީ 1998 ވަނަ އަހަރެވެ. އައިޓީއީގައި ދިވެހި ސެކަންޑްރީ ޓީޗިން ކޯސް ހަދަމުން ގެންދިޔަ ދުވަސްވަރެވެ. އެ ދުވަސްވަރު ކޯހުގައި ކިޔަވައިދިން ބައިތަކުގެ ތެރެއިން، ޚަބަރު ގަޑި ނަންގަވަން ވަޑައިގަންނަވާނީ މަޑުލު ވަހީދުކަން އެނގުމާ އެކު، އަޅުގަނޑު ވަރަށް އުފާވިއެވެ. ވަހީދާ އެންމެ ފުރަތަމަ ބައްދަލުވީ އެ ކްލާސްރޫމުންނެވެ. އުސްތާޒެއްގެ ގޮތުގައެވެ. އަޅުގަނޑުމެންނަށް ޚަބަރު ލިޔަން ދަސްކޮށްދެއްވީ ވަހީދެވެ. ޚަބަރުގެ ސުރުޚީ ނަގާނެގޮތާއި، ލީޑް އުފައްދާނޭގޮތާއި، ފަސް ކާފު ހަމަކުރަންޖެހޭކަމާއި، މައުލޫމާތު ތަރުތީބުކުރާނެ ގޮތާއި، މި ކަންކަން ދަސްކޮށްދެއްވި ބޭފުޅަކީ މަރުހޫމް ވަހީދެވެ.
ކިޔަވައިދެއްވަން ވަޑައިގެންނެވި ހިސާބުން، ވަހީދާއި އަޅުގަނޑާ ދެމެދު ވަނީ ރައްޓެހިކަން އުފެދިފައެވެ. އަޅުގަނޑު ހަނދާންވާގޮތުން އޭރު ވަހީދު ވަޒީފާ އަދާކުރައްވަނީ، ދިވެހިބަހާއި ތާރީޚަށް ޚިދުމަތްކުރާ ގައުމީ މަރުކަޒުގައެވެ. އެކި ކަންކަމުގައި ގައުމީ މަރުކަޒަށް އޭރު ވެސް އަޅުގަނޑު ދަމެވެ. އެހެން ދާ ދިޔުމުގައި ވަހީދާ ބައްދަލުވެއެވެ. ދިމާވާ ހަމަ ކޮންމެ ފަހަރަކު ވެސް، ސަލާންކޮށްލައްވައި، ހާލު އައްސަވައި، ވާހަކަފުޅު ދައްކަވައެވެ.
ދިވެހިބަހާއި ތާރީޚަށް ޚިދުމަތްކުރާ ގައުމީ މަރުކަޒުގައި، މަސައްކަތެއްކުރާން އަޅުގަނޑު އިން ދުވަހެކެވެ. އަޅުގަނޑު އިން މޭޒުގެ އެއްކޮޅުގައި ވަހީދު އިންނެވިއެވެ. އިނގިރޭސި ބަހުން ލިޔެފައި އޮތް ލިޔުމެއް، ދިވެބަހަށް ތަރުޖަމާކުރައްވާށެވެ. އިނގިރޭސި ލިޔުމުގެ ޖުމުލަތައް ވިދާޅުވަމުން، ދިވެހިބަހަށް ބަދަލުކުރައްވަމުން ގެންދެވީ ނުހަނު ފަރިތަކަމާ އެކުގައެވެ. ހީވަނީ ދިވެހިބަހުން ލިޔެފައި އޮތް ލިޔުމެއް ވިދާޅުވަމުން، އޮތް ގޮތަށް ޖުމުލަތައް ނަކަލުކުރައްވަމުން ގެންދަވާހެންނެވެ. އެހައި ވެސް ފަރިތައެވެ. އެ ދުވަހު އަޅުގަނޑުގެ ހިތަށް އެރިއެވެ. ވަހީދު މޮޅުފުޅީ ހަމަ އެކަނި ދިވެހިބަހަކަށް ނޫންތާއެވެ. އިނގިރޭސި ބަހަށް ވެސް ހަމަ އެހައިމެ މޮޅުފުޅެވެ.
އަޅުގަނޑާއި މަޑުލުވަހީދުގެ ގާތްކަން އިތުރަށް ބަދަހިވީ، ދިވެހިބަހާއި ތާރީޚަށް ޚިދުމަތްކުރާ ގައުމީ މަރުކަޒުން އެއް އަހަރަކު ބޭއްވި، ދިގުވާހަކަ ލިޔުމުގެ ގައުމީ މުބާރާތުގެ، ފަނޑިޔާރުންގެ ކޮމިޓީގައި އަޅުގަނޑުމެން ދެ މީހުން އެކުގައި މަސައްކަތްކުރާން ޖެހުނު ހިސާބުންނެވެ. އޭގެފަހުން ދިމާވާ ހަމަ ކޮންމެ ތަނަކުން ވެސް ވަރަށް ގާތްކޮށް ވާހަކަފުޅު ދައްކަވާނެއެވެ. ހާލު އައްސަވާނެއެވެ. އަނބިދަރިންގެ ހާލު ވެސް އައްސަވާނެއެވެ. ދިރިއުޅުން ކިހިނެއްތޯ އައްސަވާނެއެވެ. ސައިތައްޓަކަށް ދައުވަތު ނުދޭ ފަހަރެއް ވަރަށް މަދުވާނެއެވެ. ދިމާ ނުވެ ދުވަސްކޮޅެއް ވޭތުވެއްޖެ ނަމަ ފޯނު ކުރައްވާނެއެވެ. ވިދާޅުވާނެއެވެ.
“މީ ވަހީދު އިނގޭތޯ؟ ކިހިނެއްތޯ ހާލުކޮޅު؟ އަނބިދަރިން ރަނގަޅުތޯ؟ ދިރިއުޅުން ކިހިނެއްތޯ؟ އެއްވެސް ކަމަކަށް ދަތިތޯ؟”
މިއީ މި ގޮތަށް ގުޅުއްވާ ދުވަސްދުވަހު އާންމުކޮށް ވަހީދު ކުރައްވާ ސުވާލުތަކެވެ. މާ ގިނަ ވާހަކަތަކެއް ނުދައްކަވާނެއެވެ. މި ފަދަ ކޮންމެ ކޯލަކަށް ފަހު، ދެން ފަހަރަކުން ވަހީދަށް ވުރެ ކުރީން އަޅުގަނޑު ވަހީދަށް ގުޅައި، ހާލު އަހާނަމޭ ހިތައި ހުއްޓައި، ދެން ވެސް ގުޅުއްވާނީ ވަހީދެވެ. ހަނދާންނެތިފައި ހުއްޓައި ވަހީދު ގުޅުއްވަނީއެވެ. އެހެންވާތީ ދެރަ ވެސް ވެއެވެ. އާލާސްކަންފުޅާ އުޅުއްވަމުން ވެސް ދޭތެރެއަކުން ގުޅުއްވާލައްވާނެއެވެ. ދިމާވާ ފަހަރުފަހަރު ނަސޭހަތުގެ ބަސްފުޅުތައް ވެސް ވިދާޅުވާނެއެވެ. އެހެންކަމުން ވަހީދު އަޅުގަނޑަށް ސިފަކުރެވެނީ ވަރަށް އާދަޔާ ޚިލާފު ބޭފުޅެއްގެ ގޮތުގައެވެ. ހިތްޕުޅު ތިރި، ބަސްފުޅު މަދު، ދީލަތި، ޚުލްޤު ހެޔޮ ބޭފުޅެއްގެ ގޮތުގައެވެ.
ވަހީދު އާލާސްކަންފުޅާ އުޅުއްވާކަން އަޅުގަނޑަށް އެނގުނީ، އަޅުގަނޑު އިންޑިޔާގައި ހުއްޓައެވެ. އެއީ މި ދިޔަ މާރިޗު މަހުގެ ނުވަވަނަ ދުވަހެވެ. އެ ދުވަހު ފޯނުން އަޅުގަނޑު ވަހީދާ ވާހަކަ ދެއްކީމެވެ. އެކެޑަމީގެ ރައީސް، ޑރ. އަޝްރަފް ޢަބްދުއްރަހީމް، ވަހީދު އަރިހުގައި އިންނެވި ވަގުތެއްގައި، އޭނާގެ ފޯނަށް ގުޅައިގެންނެވެ. އެ ދުވަހު ވަހީދު އަރިހު ހާލުކޮޅު ކިހިނެއްތޯ އަހައި، އަވަސް ޝިފާއަކަށް އެދުނީމެވެ. އެއީ އަޅުގަނޑަށް ވަހީދާ ވާހަކަދެއްކޭ އެންމެ ފަހު ދުވަސްކަން އެނގޭ ނަމަ، އެ ދުވަހު އަޅުގަނޑު ވަހީދާ ހާދަ ވާހަކައެއް ދައްކާނަމެވެ. އެ ފޯނުގައި ހާދަ ވަގުތެއް ހޭދަކުރާނަމެވެ. އެހެންނަމަވެސް އެ ދުވަހު އެ ކަމެއް ނޭނގެއެވެ. އެހެންކަމުން އެ ކޯލު މާ ދިގެއް ނުކުރަމެވެ.
އަޅުގަނޑު އިންޑިޔާއިން އެނބުރި އައީ އޭޕްރީލްމަހު 10 ވަނަ ދުވަހުގެ ރޭގަނޑުއެވެ. އަޅުގަނޑު ހުރީ މާލެ އައިސް ވަހީދު އަރިހަށް ޒިޔާރަތްކޮށްލަން ނިޔަތްގަނެގެންނެވެ. އެހެންނަމަވެސް ނުދެވި އުޅެނިކޮށް، އޭޕްރީލް 14 ވަނަ ދުވަހު، އާދެ، ދިވެހިބަހުގެ ދުވަހު ހެނދުނު 8:30 އެހައިކަންހައި އިރު، އަޅުގަނޑަށް ލިބުނީ، ހިތާމައާއި ހިތްދަތިކަމުން ބަނދެވުނު ޚަބަރެކެވެ. ވަހީދުގެ ފުރާނަފުޅު އަބަދުގެ އަބަދަށް، މި ފަނާވަނިވި ދުނިޔެ ދޫކޮށް، ﷲގެ މަތިވެރި ޙަޟުރަތަށް ދަތުރުކުރި ޚަބަރެވެ. އެ ހިތި ޚަބަރު އަޅުގަނޑަށް ދެއްވީ އަޅުގަނޑުގެ އަޚް، ހޯރަފުށީ މުހައްމަދު ސަލީމެވެ. އެ ޚަބަރު ލިބުމުން އަޅުގަނޑުގެ ހަށިގަނޑުގެ ހިނގުން ހިނދުކޮޅަކަށް ހުއްޓުނު ކަހަލައެވެ. ނާރުތަކުގައި ހިނގައިގަތީ ހިތްދަތި ވޭނީ އިހުސާސްތަކެވެ. ނުހަނު ހެޔޮއެދޭ އެހައިމެ އިޚުލާސްތެރި އަޚަކު ވަކިވެދިޔުމުން ކުރެވޭ، ފުން ހިތާމަތަކެވެ.
އަޅުގަނޑުގެ ދުޢާއަކީ ﷲ ސުބުޙާނަހޫ ވަތަޢާލާގެ ހެޔޮ ރަހުމަތާ އެކު، މަރުހޫމް ވަހީދުގެ ފާފަތައް ފުއްސަވައި، ފުރާނަފުޅަށް ސުވަރުގޭގެ މަތިވެރި ނިއުމަތް މިންވަރުކުރެއްވުމެވެ. މަރުހޫމްގެ އާއިލާއަށް ކެތްތެރިކަމާއި ސާބިތުކަން ދެއްވުމެވެ. އާމީން!
ނިމުނީ
Be the first to comment